मा. मुख्यमंत्री श्री. देवेंद्र फडणवीस यांनी आज वर्धा जिल्ह्यातील विविध विकास कामांचा आढावा घेतला. अधिकाऱ्यांनी शेतकऱ्याप्रती अधिक संवेदनशील असावे, असे आवाहन त्यांनी यावेळी केले. जलयुक्त शिवार हा सरकारचा प्राधान्यक्रमावरील प्रकल्प आहे. पावसाळ्यापूर्वी ती कामे पूर्ण करा. जे अधिकारी काम करण्यात दिरंगाई करतील, त्यांच्यावर कडक कारवाई करण्यात येईल आणि त्यांच्या सेवापुस्तिकेत सुद्धा तशी नोंद घेण्यात येईल. मागतील त्या प्रत्येक शेतकऱ्याला वीजजोडणी दिली पाहिजे. सरकारने निधी उपलब्ध करून दिला आहे. जे कंत्राटदार काम करण्यात दिरंगाई करतील, त्यांच्यावर फौजदारी गुन्हे दाखल करण्यात यावेत, असे निर्देश मुख्यमंत्र्यांनी दिले. विकास कामात अधिकाऱ्याच्या सहभागाबाबत दर आठवड्याला अहवाल सादर करा, असे निर्देश मुख्यमंत्र्यांनी विभागीय आयुक्तांना दिले.